Professor Lucas da Costa, Aliás Lahe-Mau ou Rama-Metan, moris iha Atsabe 11 Janeiru 1952, hakotu i’is iha Dili 5 Setembru 2019. Professor Lucas koñesidu hanesan salah satu fundador RENETIL, Fundador Universidade de Dili no Universidade da Paz. Iha tinan 1998, Professor Lucas hanesan membru komisaun polítika Conselho Nacional da Resistencia Timorense. Husi 2007 to’o 2019, Professor Lucas nu’udar deputadu iha Parlamentu Nasional iha Komisaun C asuntu Ekonomia, Finansa no Anti-Korupsaun. Professor Lucas dedika nia-an tomak nu’udar aman no reitor UNPAZ to’o nia i’is ikus iha mundu ne’e.

Relembra momentu ida Prof. Dr. Lucas da Costa sai orador iha seminariu ba selebrasaun Loron Nasional Juventude no Massacre Santa Cruz, 12 Novembru 2018, ne’ebé organiza husi APFTL, iha nia palestra ho topiku ‘Prezensa mega projetu hodi harahun dezempregu iha Timor-Leste’, nia liafuan mesak animada no ho maneira divertida halo juventude sira ne’ebé partisipa iha seminariu senti haksolok no gosta tebes hodi rona nia liafuan. Nu’udar peritu iha area ekonomia, Professor Lucas esplika nia topiku iha seminariu no mos esplika situasaun ekonomia Timor-Leste ho maneira ne’ebé badak, simples no klaru, hodi halo Juventude sira mos bele entende ho diak. Professor Lucas mos momentu ne’ebá dezafia juventude sira hodi dezenvolve sira nia-an hodi fo mos kontribuisaun ba dezenvolvimentu Nasional.

“Joven sira labele halo-an bo’ot iha Problema ki’ik ida nia Laran” dehan Rama-Metan iha nia palestra iha Salaun Ministeiru Finansa.

Liafuan ne’e refleta duni Ita juventude agora, halo-an superior no sok tau, dalabarak ita joven gaba-an matenek los ona. Professor Lucas mos dehan para labele fiar ema ne’ebé halo-an matenek, no foinsa’e sira labele halo-an matenek liu maibé mos labele pesimista liu ho ita nia kapasidade, 'Labele foti-an liu no labele haraik-an liu'. Nia mos husu para joven sira tenke lakon tempu ba vizaun ida para dezenvolve-an, Professor Lucas mos hateten katak ema sira ne'ebe hatene jere oras-24 iha loron ida nia laran, nia maka hatene dalan ba suksesu, tanba ema suksesu ne'e laos tanba ema ne'e riku ka matenek, maibe ema suksesu ne'e tanba hatene jere tempu ho diak.

Professor Lucas da Costa nu'udar Manorin ida ne’ebé hatene oinsa estimula nia estudante sira para iha hanoin hodi dezenvolve rai doben Timor-Leste, Professor Lucas dedika nia-an tomak ba foinsa’e sira no edukasaun to’o nia i’s ikus iha mundu ne’e.

Adeus Professor Rama-Metan, ami hotu-hotu senti lakon Manorin di’ak ida, ami la fiar katak Ita nia história to’o ona nia rohan, deskansa ho hakmatek ba!

Leave a comment

Filtered HTML

  • Web page addresses and e-mail addresses turn into links automatically.
  • Allowed HTML tags: <a> <em> <strong> <cite> <blockquote> <code> <ul> <ol> <li> <dl> <dt> <dd>
  • Lines and paragraphs break automatically.

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.