Prezidenti Exekutivu Alumni Parlamentu Foinsa’e Timor-Leste, Zaulino Gomes da Silva, hamutuk ho Estrutura Exekutivu no membru APFTL, halo asaun karidade hodi distribui aihan no nesesidade basiku sira ba uma-kain 20 iha aldeia Lenuk Hun, iha loron 29 fulan maiu tinan 2020.

Antes ne’e mos Estrutura Exekutivu APFTL halao asaun karidade hanesan ba komunidade Tasi-Tolu, no membru APFTL munisipiu Baucau, hola inisiativa hodi fo apoiu karidade komunidade sira iha Munisipiu Baukau.

Prezidenti Exekutivu APFTL hateten, nu’udar Organizasaun Juventude voluntaria, "maske APFTL mai ho kbiit naton deit, hakarak tulun mos komunidade sira ne’ebé presija duni tulun iha momentu emerjensia ne’e". dehan Zaulino Gomes da Silva iha Lenuk Hun, 29/05/2020.

Chefe Aldeia Lenuk Hun, Sr. Jacinto Soares hateten, komunidade Lenuk Hun barak liu moris husi faan ai-maran no nu'udar vendedor “aileba” hodi faan ikan iha Dili laran, no agora sira labele halao atividade hanesan baibain hodi ba buka osan atu sustenta sira nia moris, tanba estadu emerjensia ba prevensaun COVID-19, ida ne'e sai preokupasaun maka'as tebes tanba komunidade sira menus los ona aihan.

“Ha’u hato’o agradese tebes ba apoiu ne’e, no ha’u identifika uma-kain 20 maka presija tulun tebes, ne'e mesak idozu no feto-faluk ho nia oan sira, mas la signifika sira 20 ne’e maka presija tulun, sei iha familia barak tan maka presija tulun mos” dehan Sr. Jacinto Soares.

Prezidenti Republika Deklara tan ona Estadu Emerjensia ba Dala tolu husi loron 28 Maiu 2020 to'o 26 Junu 2020, ho intensaun prevene nasaun husi Surtu COVID-19 ne'ebe mundu tomak enfrenta hela, iha parte seluk mos, komunidade preokupadu tebes ba aihan tanba sira nia atividade baibain limitada tan hodi kumpri Estadu Emerjensia, no ida ne'e halo sira la hetan rendimentu atu sustenta sira nia moris lor-loron.