Alumni Parlamentu Foinsa'e Timor-Leste (APFTL) hala'o formasaun Life Skill Basic Education (LSBE) ba foinsa'e hamutuk 21 iha Suku Meligo, Postu Administrativu Cailaco, Munisipiu Bobonaro

Objetivu husi formasaun ne'e hodi hasa'e kunhesimentu, forma karakter síviku no dezenvolve kapasidade foinsa'e sira nian, oinsa bele eduka sira hatene hadok an husi buat at no hatudu hahalok diak iha sosiedade

Iha Intervista ho partisipante Cristovão Soares sente kontente tebes tanba bele hetan oportunidade hodi tuir formasaun Edukasaun Bázika Bazeia ba Abilidade Moris

"Ha'u sente laran haksolok tanba Ha'u bele hetan formasaun ne'e husi APFTL, Ha'u bele aprende oinsa hatene moris iha família ne'ebe nakonu ho domin, empatia no halo komunikasaun ne'ebe diak liliu oinsa bele ajuda malu no hadomi ema seluk". Cristovão Soares hateten

Partisipante Claudia Hermelinda Soares fo agradese ba Alumni Parlamentu Foinsa'e Timor-Leste (APFTL) tanba bele fo formasaun ba sira durante loron nia laran, iha ne'ebé halo sira aprende, diskute no hakroat sira nia hanoin diak liu tan

"Agradese ba APFTL ne'ebe fo ona formasaun ba ami durante loron tolu nia laran, ami bele aprende buat barak kona ba empatia, Komunikasaun, sente ema seluk nia sentimentu, domina emosaun no rezolve problema, Ami fiar katak ba oin ami sei hadia an diak liu tan." Afirma Cláudia Hermelinda Soares

Iha sorin seluk, Xefe Suku Meligo, Amancio Barreto da Conceição haktuir, nia parte sente kontente tebes tanba APFTL bele mai fasilita formasaun ba foinsa'e sira hodi hasa'e sira nia kunhesimentu no forma sira sai joven ne'ebe diak ba futuru

"Ha'u sente kontente tebes tanba APFTL bele mai fasilita formasaun ba foinsa'e sira iha Suku Meligo, programa ne'e bele hasa'e konhesimentu foinsa'e sira nian iha suku ne'e hodi bele sai foinsa'e ne'ebe iha hahalok diak no sai susesu iha aban bainrua". Hateten Xefe Suku Meligo Xefe Suku Meligo, Amancio Barreto da Conceição, iha Meligo, Cailaco, 23/09/2023

Enkuantu, Formasaun ne'e la'o durante loron tolu nia laran ne'ebe fasilita husi Membru APFTL, Formasaun refere realiza tanba APFTL servisu hamutuk ho UNICEF Timor-Leste. Foinsa'e sira ne'ebé partisipa iha formasaun ne'e hamutuk 21 kompostu husi feto 12 no mane na'in 9.

#JovenAtivuSaudavelProdutivuKompetitivuOrgulluNuudarTimorOan