Alumni Parlamentu Foinsa’e Timor-Leste (APFTL) parseria ho ChildFund Timor-Leste halo abertura ba Formasaun ba Formadór sira kona-ba Swipe Safe Seguransa Online nu’udar Abordajen Sistemátiku hodi halo Internet Seguransa ba Labarik no Jovén sira. Atividade ne’e hala’o iha Salaun Rede Feto Caicoli durante loron tolu, hahú loron 21-23, fulan- Juñu-tinan-2023.

Diretora Nasionál ChilFund Timor-Leste haktuir, objetivu hosi Swipe Safe ne’e maka, “Hametin Ambiente Protesaun Online ba Labarik no Joven sira liuhosi demonstra no inkorpora edukasaun Seguransa Online ba Labarik, Kuidadór sira, no Responsabilidade labarik sira-nian iha Ázia laran tomak iha Nível lokál no nasionál”.

Iha sorin seluk, Prezidenti APFTL Zaulino Gomes da Silva “kongratula formadór sira atu aproveita no absorve matéria ne’e ho didi’ak para depois transmiti fila-fali ba  ita-nia maluk jovén sira seluk,tanba ohin loron ita hotu hatene seguransa online sai preokupasaun boot ba ema hotu no oinsá ema matenek atu uza internet ne’e ho seguru”.

Formador Swipe Safe hamutuk na’in-33 kompostu hosi feto na’in-16 no mane na’in-17 no projetu SWIPE SAFE ne’e sei implemeta iha munisípiu rua maka Lautem no Dili ho tarjetu foin-sa’e hamutuk na’in-5000 no kuidador/inan aman hamutuk na’in-1000 ho totál hamutuk na’in-6000 durante tinan-rua nia laran.

Iha Aberura Formasaun ba Formadór ne’e hetan partisipa hosi:Diretór Jerál AGF nu’udar Reprezentante hosi MEJD, Prezidenti INDICCA, Senior Adviser Child Protection hosi Austrália, Diretora Nasionál ChilFund Timor-Leste, Prezidenti APFTL no Formadór sira.

Atividade Formasaun ba Formadór ne’e, realiza tanba servisu hamutuk entre ChildFund ho APFTL no hetan apoiu finanseiru hosi Governu Australia.

#JovenAtivuSaudavelProdutivuKompetitivuOrgulluNuudarTimorOan