Membru Parlamentu Foinsa’e Nian (M-PFN) Periodu 2019-2022 hosin Munisipiu Baucau Organiza “ Forum Parlamentu Foinsa’e Munisipal”. Iha atividade ne’e PFN hamutuk ho Foinsa’e sira halo diskusaun [PNJ]interativu kona-ba Tematiku Lima ne’ebé kontempla iha Polítika Nasionál Juventude ], temátika hirak ne’e maka: Joven ho Edukasaun, Joven Moris ho Saudavel, Joven ho Empregu no Empregabilidade, Joven Partisipasaun Siviku no Joven Violensia no Krime. Atividade ne’e halao durante loron tolu, hahu loron 06 to’o 08 fulan Jullu tinan 2022 iha Salaun Administrasaun Venilale, Munisipiu Baucau.

Objetivu hosi Forum refere, hodi identifika  oportunidade no dezafiu  ne’ebe maka joven sira enfrenta iha Venilale bazeia ba realidade ne’ebe maka iha. Iha parte seluk kria mos espasu ba joven sira hodi partisipa iha atividade expozisaun produtiva no Jogu amizade.

Iha abertura Señor Administrador Postu Administrativu Venilale Mingel Mendes Manso Guterres hateten,” espera liuhosi diskusaun ne’e, Venilale oan sira aproveita koalia problema ne’ebe maka iha suku, Postu no Munisipiu. Imi joven maka Jerasaun foun  no esperansa ba Rai ida ne’e”.

Iha Fatin hanesan, Ofisial SEJD Munisipiu Baucau Gabriel da Piedade Fraga  akresenta,” SEJD kria Parlamentu Foinsa’e  hanesan espasu ba Foinsa’e sira atu aprende no forma sai Lideransa ida diak atu bele kontribui  ba rai ida ne’e. Hanesan  moto SEJD katak “ Tane Foinsa’e Fini Ukun Nain”, liuhosi atividade ida ne’e, koko PFN sira nia responsabilidade no mentalidade Lideransa nian. Hau Louva alin sira, tamba aprende no bele pratika, ida ne’e hanesan parte pozitivu ida hosi PFN”.

Representante APFTL  Benvinda Gusmão Alves , expresa mós  katak; atividade ida ne’e nu’udar apoiu inisiativa ba PFN sira atu pratika saida maka sira aprende  durante sira nia mandatu nu’udar PFN. No atividade ne’e hetan apoiu hosi SEJD liuhosi APFTL no Implementa hosi PFN.

Atividade Forum Parlamentu Foinsa’e Munisipal ne’e, partisipa hosi,  Administrador Postu Venilale, Komadante Eskuadra Venilale, Professores no Estudante hosi Eskola ETV Venilale, ESGV Venilale, ESSJB Venilale, APFTL no M-PFN.

#JovenAtivuSaudavelProdutivukompetitivuOrgulluNuudarTimorOan