Ministériu Edukasaun Juventude no Desportu (MEJD),reprezenta hosi Diretór Jerál Planu, Polítika,Inkluzaun no Imprensaun (DG PPII),Sr.Raimundo José Neto ofisialmente kontinua halo lansamentu ba Filmajen ho konteúdu “Foin-sa’e Preparadu ba Futuru Ne’ebé Nabilan” iha Eskola Ensinu Báziku Central (EBC). Becora,Dili (28/03/2022).

Objetivu hosi Filme ne’e,maka transforma no eduka estudante feto no mane bele komprende di’ak liután impaktu hosi Violénsia no isin-rua ho menoridade, nune’e prepara sira-nia mentalidade no koñesimentu hodi hasoru situasaun sira hanesan ne’e iha futuru. No ba profesór sira no estudante hatene di’ak liutan kona-ba polítika relevante sira ne’ebe MEJD no MSSI iha ona.Tanba dala barak akontese diskriminasaun halo sira tenki hapara sira-nia eskola no impede sira-nia direitu hodi asesu ba Edukasaun ,nune’e susar ba sira atu atinji sira-nia mehi.

 Iha Lansamentu refere, DG-PPII, Sr.Raimundo José Neto hahaten, “ Sai Foin-sa’e ne’ebe di’ak no preparadu ba Futuru ne’ebé Nabilan presiza iha kapasidade, mentalidade, moralidade ne’ebé di’ak atu labele komete violénsia no isin-rua ho minoridade . Nune’e bele atinji imi-nia mehi  ne’ebe furak iha futuru.

Iha Okaziaun ne’e ,Diretór Edukasaun Munisípiu Dili,Sr. Carlito da Silva haktuir, “foin-sa’e sira maka futuru ba Estadu  Demokrátiku ida-ne’e no atu dezenvolve nasaun ne’e ba oin, presiza imi-nia moralidade, mentalidade ne’ebé di’ak  hodi kompete ho nasaun dezenvolvidu sira seluk.

Iha sorin seluk, Diretór Eskola EBC Esperança da Pátria, Sr. João da Silva Pereira akresenta, programa ida-ne’e  di’ak tebes no espera katak  reflesaun filmajen ne’e bele muda/transforma estudante sira-nia hanoin no mentalidade sai di’ak liu tan.

Iha fatin hanesan, estudante EBC Esperança da Pátria Sergio dos Santos da Costa espresa, “ senti kontenti ba bin no maun APFTL sira tanba bele lori filmajen mai loke iha ami-nia Eskola no vantajeb hosi filmajen ne’e maka ami bele prepara-an di’ak liu tan atu labele monu ba violénsia no isin-rua sedu ba ha’u-nia kolega feto sira iha Futuru”.

Seremonia Lansamentu ne’e partisipa hosi MEJD DG-PPII ho nia ekipa, Diretór Edukasaun Munisípiu Dili, representante UNICEF,APFTL, Manorin no Estudante iha Eskola refere .Aleinde halo lansamentu iha Eskola Ensinu Báziku Central (EBC). Becora,Dili. Ekipa APFTL kontinua habelar Filmajen ne’e iha eskola seluk maka hanesan: (ESG) 12 Novembru, (ESG) 4 de Setembru Unamet Dili no ESG Nicolau Lobato Dili.

Atividade refere realiza tanba servisu hamutuk entre, UNICEF ho MEJD no Implementa hosi Alumni Parlamentu Foinsa’e Timor Leste (APFTL).