Alumni Parlamentu Foinsa'e Timor-Leste entrega sertifikadu ba foinsa'e nain-26 ne'ebe remata ona formasaun Analiza Sosial Baziku (ANSOS)

Objetivu husi formasaun ANSOS ne'e rasik maka lori foinsa'e sira hodi sensivel ho problema sosial sira, no mos bele hanori foinsa'e sira iha hanoin kritiku ba problema sosial ne'ebe akontese iha foinsa'e sira nia le'et, hodi buka nia solusaun ba problema refere.

Partisipante formasaun, Antonia F. G. Sousa, nia agradese tebes tan hetan espasu hodi aprende no hetan experiensia foun hodi aumenta tan nia hanoin kritiku, no mos bele halo diskusaun ho partisipante formasaun sira seluk ne'ebe mai husi grupu ka organizasaun juventude la hanesan.

Nune'e mos ho Jose Fernande Fatima, nia husu para APFTL kontinua halo formasaun hanesan ne'e ba foinsa'e sira seluk, tanba foinsa'e barak maka presiza duni hetan formasaun iha area oi-oin.

Prezidente Exekutivu APFTL, Zaulino Gomes da Silva, hateten,

APFTL bele fo ba kolega foinsa'e sira saida maka nia iha, APFTL fo espasu ba foinsa'e sira ne'ebe hakarak aprende, la selu ba APFTL, maibe formasaun nafatin lao ho rigor, hodi nune'e sertifikadu sira kolega sira hetan ne'e iha nia pesu [kualidade].

 Prezidente Zaulino mos dehan, APFTL bele fasilita formasaun ba materia sira barak, hanesan LSBE, Edukasaun Sivika, Jestaun Organizasaun, Lideransa Baziku nst.

Formasaun ANSOS ne'e rasik durante loron tolu, dia 11-12 no 14 Setembru 2020 iha Sede APFTL Becora, partisipa husi Foinsa'e nain-26 ne'ebe mai husi APFTL rasik, grupu HIR, Asosiasaun Estudante Munisipiu Ainaro (ASEMA), TLYFP no joven baibain, ne'ebe fasilita husi Chefe Divizaun Fortalesimentu Instituisional APFTL, Cesar Ferreira.