Diretor Jeral MEJD DG-PPII,Halo Lansamentu Filme Iha Munisipiu Viqueque .

Ministériu Edukasaun Juventude no Desportu (MEJD),reprezenta hosi Diretór Jerál Planu, Polítika,Inkluzaun no Imprensaun (DG PPII),Sr.Raimundo José Neto ofisialmente halo lansamentu ba Filmajen ho konteúdu “Foin-sa’e Preparadu ba Futuru Ne’ebé Nabilan” iha Eskola Ensinu Sekundáriu Jerál (ESG) Liceu 4 de Setembro Viqueque Vila,(09/03/2022).

Objetivu hosi Filme ne’e,maka transforma no eduka estudante feto no mane bele komprende di’ak liután impaktu hosi Violénsia no isin-rua ho menoridade, nune’e prepara sira-nia mentalidade no koñesimentu hodi hasoru situasaun sira hanesan ne’e iha futuru. No ba profesór sira no estudante hatene di’ak liutan kona-ba polítika relevante sira ne’ebe MEJD no MSSI iha ona.Tanba dala barak akontese diskriminasaun halo sira tenki hapara sira-nia eskola no impede sira-nia direitu hodi asesu ba Edukasaun ,nune’e susar ba sira atu atinji sira-nia mehi.

Iha Lansamentu refere, DG-PPII, Sr.Raimundo José Neto hahaten,” Dezezu no previléjiu ba ESG 4  de Setembro, filmajen ne’e sai hanesan reflesaun Importante tebes ba ita-boot sira hodi bele prepara imi nia-an di’ak liután no  prevene imi-nia an hosi violénsia no isin-rua ho menoridade iha futuru mai no ba Manorin/ Profesór sira atu bele implementa Programa Fila hikas ba eskola no Programa Bolsa da Mãe, nune’e labele hamate estudante feto sira-nia vontade atu bele kontinua sira-nia estudu.

Iha biban ne’e, Diretór Edukasaun Munisípiu Viqueque Emídio Amaral dehan,atu hadi’a ita-nia Nasaun presiza matenek no buat oioin ‘’hanesann babain ha’u hateten  Timór atu ba oin iha buat tolu de’it  maka : edukadu, informadu no kualifikadu “ tanba ne’e ohin oportunidade di’ak ba estudante liceu 4 de setembru atu tuir formasaun tanba joven agora la’ós joven loriku aswa’in maibé juventude agora juventude domin-na’in no juventude dezenvolvimentu tanba ne’e ami fiar imi  no iha futuru imi maka sei ukun rai ida-ne’e, importante maka imi tenki estuda no prepara imi-nia an didia’k.

Iha sorin seluk, Diretór Eskola ESG Liceu 4 de Setembro, Veríssimo Marques da Silva akresenta, atu konkista foin-sa’e sira-nia futuru ne’ebé nabilan iha futuru, ita presiza prepara foin-sa’e sira liuhosi formasaun/treinamentu, liuhosi ida-ne’e maka ita-bele hetan  vitória ida ba futuru ida-ne’ebé nabilan.Futuru nabilan la’ós mosu de’it ,maibé ita presiza prepara no esforsu liuhosi eskola no estuda . Agradese ba APFTL,UNICEF no MEJD ne’ebe,hili ami-nia eskola Liceu 4 de Setembru hodi bele mai loke Filme iha ne’e, hodi prepara ami-nia oan sira-nia mentalidade ba Futuru.

Seremonia Lansamentu ne’e partisipa hosi MEJD DG-PPII ho nia ekipa, Diretór Edukasaun Munisípiu Viqueque, APFTL, Manorin no Estudante iha Eskola refere .Aleinde halo lansamentu iha ESG Liceu 4 Setembro no ESG Uatucarbau ,Ekipa APFTL kontinua habelar Filmajen ne’e iha eskola seluk maka hanesan: (ESG) Olokasa Ossu, (ESG) Calixa Viqueque Vila.

Atividade refere realiza tanba servisu hamutuk entre, UNICEF ho MEJD no Implementa hosi Alumni Parlamentu Foinsa’e Timor Leste (APFTL).

 

                                                                                                                                                                                          

Hakerek Komentariu Iha Account Facebook

0 Komentariu

HAKEREK KOMENTARIU

Fatin Email