Dili, 21-Fulan Marsu-Tinan 2023, Membru Parlamentu Foinsa’e Nian (PFN) marka audensia ho Prezidenti Repúblika Demokrátika Timor-Leste (RDTL) iha nia Knaar fatin Aitarak Laran, Dili.  Objetivu hosi audénsia ne’e membru PFN entrega rezultadu  Plenária-PFN,2022 ba Sua Exelénsia  Prezidenti Repúblika.

Rezultadu refere mai hosi dadus hirak ne'ebé membru PFN sira identifika no foti iha baze, hafoin diskuti hodi agrupa kada temátiku no elabora iha enkontru komisaun nian.  Hafoin aprezenta dadus hirak ne'e iha Plenária hodi halo debate no aprovasaun. Dadus hirak  ne’ebé aprovadu konsidera importante no pertinente, nune'e  mak PFN hola inisiativa hodi aprezenta rezultadu hirak ne'e ba Xefe Estadu, inklui Instituisaun  kompetente no relevante sira hodi toma desizaun bazeia ba estudu hirak ne'e.

Iha audénsia ne’e, Sua Exelénsia Prezidenti Repúblika Dr. José Ramos-Horta hateten, “agradese no orgullu tebes ba rekomendasaun sira-ne’ebé maka membru Parlamentu Foinsa’e sira prodúz  tanba rekomendasaun ne’e relevante ho situasaun reál mak akontese iha Timór no ha'u-rasik mós observa diretamente no rekomendasaun hirak ne’e ha'u sei hato’o ba liña ministeriais sira, nune’e sira bele tau iha sira-nia polítika”.

Iha sorin seluk, representante membru PFN Celina Franklin, orgullu tabba bele hasoru direita ho Xefe Estadu no entrega rezultadu Plenária refere.

Rezultadu ne’e aprovadu ona iha Plenária-PFN nian, ne’ebe maka hala’o iha fulan Dezembru tinan-2022 iha Munisípiu Baucau.

 #JovenAtivuSaudavelProdutivuKompetitivuOrgulluNuudarTimorOan