Ohin loron, joven Timor barak mak iha ona telemovel ne’ebe bele asesu ba internet. Liu husi utilizasaun internet wireless ne’ebe aumenta, liu-liu iha sidade boot sira, utiliza nain telémovel ho internet matenek atu bele tama ba internet ho gratuita.

Joven Timor barak utiliza sira nia telemovel hodi asesu ba internet iha ne’ebe de’it sira ba, no ida ne’e aumenta risku ne’ebe perigozu sira sei hetan liu husi online - mai husi ne’ebe de’it iha mundu - se laiha atensaun husi ema adultu sira.

Entidade hotu-hotu iha responsabilidade no obrigasaun hodi promove no asegura seguransa ba uza teknolojia ho seguru.

Atu promove uza teknolojia ho seguru, iha tinan ida ne’e, APFTL ho SEJD realiza workshop internet saudavel iha Munisipiu 12 no RAEOA.

Objetivu hosi Workshop Internet Saudavel : Jovens sira iha ona konhesementu hodi hadook-an hosi konteudu pornografia, defamasaun no hoax, ho Indikador : Jovens nain 859 hosi munisipiu 12 no RAEOA, kada munsipiu ema nain-66, hatene ona hodi hadook-an, hosi konteudu pornografia, defamasaun no hoax.

Iha semana Segundu Fulan Junu ida ne’e, APFTL realiza ona Workshop Internet Saudável iha Munisipiu sira hanesan: Aileu, Ainaru Manatutu no Manufahi. Atividade Workshop Internet Saudavel halo ona abertura hosi Sua Exelensia Secretario Estadu Juventude no Desportu Sr. Abrão Nokosiku Saldanha liuhosi virtual ho Joven sira hosi Munisipiu Viqueque iha Dia : 28 de Maiu de 2021.

Partisipante hirak ne’ebe hola parte iha Workshop ida ne’e mak hanesan : Estudante Ensinu Basíku Terseiru Síklu, Estudante Sekundária, no Grupu Joven sira iha kada Munisipiu.

Workshop ida ne’e hafahe ba Sesaun rua, Sesaun Primeiru Promove Internet Saudavel, ne’ebe sei hahu ho Workshop Internet Saudavel, ho tema Sentral ‘’Promove Utilizasaun Teknolojia ho Seguru’’, ho nia detallu sub-tema ka temátiku : Oinsan joven sira iha kapasidade hodi reziste abuzu sexual online, hate speech, disinformation, fake new and hoax? Sesaun Segundu Partisipante sira sei fahe ba grupu rua (2), kada grupu ema nain-33, sei halo pratika, oinsa maka bele protégé sira nia privasidade bainhira uza social media.

Iha Workshop ida ne’e Marka mos prejensa husi Autoridade Lokál kada Munisipiu, Pontu Fokál SEJD teritórial, Centru Juventude. Iha Sesaun Abertura Autóridade Lokál sira hato’o sira nia sentimentu haksolok no Louva ho Inisiativa APFTL ho Apoiu hosi SEJD, hodi realiza workshop Internet Sáudavel iha Munisipiu Aileu, Ainaro, Manatutu no Manufahi, mesmuke ita hela situasaun pandémia COVID-19 afeita ba atividade no eskola sira paradu, nune’e Autoridade sira enkoraja Estudante no Foinsa’e sira atu uza didiak oportunidade ida ne’e, hodi Aprende no mos fahe ba Joven sira ne’ebe la hetan oportunidade hodi hola parte iha atividade ida ne’e.

Depois Workshop remata APFTL mos distribui Matadalan utilizasaun Internet ba Foinsa’e sira no Inan-Aman sira. Atividade ida ne’e realiza tanba APFTL parseria ho Sekrétariadu Estadu Juventude no Desportu (SEJD), atrves Diresaun Nasional Creatividade Juventude.