Objetivu husi debate públiku ne’e hodi hatene prespetiva partidu polítiku (ParPol)  no organizasaun sira nia dezenvolvimentu “Juventude no Edukasaun” Iha Timor-Leste. Iha parte seluk mak joven sira hatene ona informasaun naton kona-ba programa no/ka atividade ParPol sira nian.

Iha debate públiku ne’e partisipa husi panelista juventude partidaria mak hanesan PEP, PD, FRETILIN, MDN, MSD, FDD no AMP. Panelista husi organizasaun Juventude no reprezentante organizasaun ema ho difisiensia.

Prezidente Alumni Parlamentu Foinsa’e Timor-Leste, Zaulino Gomes da Silva esplika katak atividade ida ne’e halo ho intensaun ida hodi hatene partidu polítiku sira nia hanoin liga ho asuntu juventude ho edukasaun.

“Objetivu prinsipal husi debate públiku ne’e mak oinsá hatene prespetiva partidu polítiku koligasaun sira nian liu-liu ho juventude no edukasaun tamba ne’e mak ita realiza debate ida ne’e,” dehan Zaulino Gomes iha sede APFTL, Becora.

Nia mós akresenta katak husi debate ne’e ita bele hatene duni polítika no programa ba juventude no edukasaun ba ukun iha tinan lima nia laran. Nune’e mós joven hirak ne’ebé mak rona debate ida ne’e,bele halo desizaun lolos ba partidu no koligasaun partidu ne’ebé mak kompete dadaun ne’e tuir nia prespektiva no konsiensia rasik.

Atividade ne'e susesu tamba hetan kontribuisaun maximu husi parte hotu-hotu. #[Maria do Ceu/APFTL/26.04.2018].