Alumni Parlamentu Foinsa'e Timor-Leste [APFTL] ho International Republican Institute [IRI] hasoru malu, iha loron 14 fulan fevereiru, iha salaun enkontru IRI, hodi kolia kona ba kontinuasaun programa Town Hall Meeting : Rona Povu nia Lian, ne’ebé servisu hamutuk mos bankada parlamentar sira.

Programa ne’e nia objetivu maka hakbesik liu tan Deputadu sira ho povu hodi rona diretamentu preukupasaun no problema ne’ebé komunidade no foinsa’e sira hasoru iha ida-idak nia munisipiu.

Rekorda katak APFTL envolve iha Programa Rona Povu nia Lian, desde tinan 2018, ho papel trata asuntu tékniku sira hanesan, preparasaun logistika, apoiu koordenasaun munisipal, hanesan moderador diskusaun, inklui foti notas no produz rezumu husi enkontru hodi bele entrega ba deputadu sira iha bankada no komisaun parlamentar sira.

Tuir xefi Divizaun Estudu no Advokasia APFTL, Noel Afranio Soares, APFTL halo ona avaliasaun ba programa ne’e, liu liu kona ba dezempenhu APFTL nian ne’ebé mak nota mos katak parte ne’e ladun apoiu maximu iha termu rekursu humanu.

Maske nune’e, Afranio rekoñese, parte APFTL hetan esperiensia lubuk ida durante perkursu programa refere. Tan ne’e nia husu ba IRI atu bele autoriza membru APFTL nain rua nune’e apoiu permanente ba realizasaun atividade refere hodi permiti instituisaun rua hakbesik liu tan no hadi’ak liu tan dinámika programa iha tempu tuir mai.

Iha sorin seluk, Ofisiál Program IRI, Maria Celia Tavares, hato’o nia apresiasaun ba kolaborasaun ne’ebé hatudu husi membru APFTL sira iha apoiu programa Rona Povu Nia Lian.

Tuir nia, komunikasaun no apoiu husi parte organizasaun juvenil ne’e di’ak tebes.

“Husi prezensa membru APFTL ne’ebe mesak foinsa’e hodi modera dialogu, aumenta interasaun ne’ebé forte liu entre membru Parlamentu Nasional ho membru komunidade sira, sira sente entusiasmu tanba foinsa’e maka modera dialogu ne’e. Ida ne’e hanesan parte ida hodi prepara lideransa ba futuru”, hateten ofisial Programa IRI.

Maria Celia Tavares mos rekoñese iha dezafiu barak durante realiza programa ne’e, inklui iha difikuldade hodi garante aprezentasaun rezultadu dialogu iha Parlamentu Nasional husi parte deputadu sira mak marka ona prezensa.

Programa Rona Povu nia Lian iha tinan ida ne’e, sei hahu, iha loron 22 fulan fevereiru, iha Postu Administrativu Maubara, Munisípiu Likisá. Sei kontinua mos programa ne'e iha postu administratiu 11.

Média APFTL