Relasiona ho informasaun ne’ebe fo sai hosi ekipa Centru Integradu Jestaun Crize iha loron: Quinta Feira Dia : 02 Abril 2020, hosi Dr. Rui Maria de Araujo, nu’udar Porta Voz, atravez hosi Media sira hanesan GMN, rttl no media online sira hotu, informa katak, Timor-Leste konfirmadu iha kazu 35 Suspeitu COVID-19, hafoin halo teste iha kazu 24 negativu no 10 sei iha hela prosesu Analiza, no 1 Pozitivu.

Iha tempu mak hanesan Vice Ministra Elia dos Reis Amaral, informa ba Jornalista sira katak, Timor-Leste konfirmadu iha kazu 23 Suspeitu COVID-19, hafoin halo teste iha kazu 22 negativu no 1 Pozitivu.

Hosi informasaun ne’e, APFTL nota katak, parte rua la fo informasaun ida ne’ebe los no kredivel ba publiku no halo publiku sai paniku no konfuzaun atu fiar los informasaun ida ne’ebe.

Nune’e mos APFTL nota katak servisu ekipa Centru Integradu Jestaun de Risco ho Ministerio da Saude laiha koordenasaun ida ne’ebe di’ak hodi fo sai informasaun ida ne’ebe kontraditoriu ba publiku relasiona ho Pandemia Corona Virus.

Ho nune’e, nu’udar organizasaun Juventude hanesan mos sidadaun Timor-Leste, haktuir ba artigu 40, konstituisaun RDTL, ne’ebe ko’alia kona-ba liberdade ba expresaun no informasaun, APFTL hakarak rekomenda:

1. Husu ba Sua Exelensia Primeiru Ministru Taur Matan Ruak, nu’udar Chefe do Governu, presiza toma medida ba assuntu ida ne’e ho rigor no define klaru papel Centru Integradu Jestaun de Risco no Ministerio da Saude ba iha luta kontra Corona Virus;

2. Husu ba Centru Integradu Jestaun de Risco no Ministerio da Saude presiza hadi’ak servisu koordenasaun, nune’e bele fo sai informasaun ida ne’ebe kredivel ba publiku;
3. Husu ba VIII Governu Konstituisional, evita assuntu Politika iha situasaun Prevensaun COVID-19, tau interese Estadu mak boot liu interese Partidu Politika;
4. Husu ba VIII Governu Konstituisional atu bele apoiu Komunidade kbiit laek iha periodu estadu emerjensia hodi luta hasoru Corona Virus;
5. Husu ba Lider Nasional sira, situasaun ida ne’e krusial tebes, Povu presiza imi nia hamutuk hodi bele lori esperansa dala ida tan, ne’ebe imi hatudu tiha ona, iha tinan 24 durante okupasaun;
6. Husu ba Komunidade sira hotu, atu nafatin halo prevensaun banati ba rekomendasaun hosi Organizasaun Mundial da Saude no Misterio da Saude, nune’e mos obedese ba regras estadu emerjensia;
7. Ikus liu, husu mos ba sidadaun sira hotu, tau nafatin fiar ba ita nia Governu, sira halo ona esforsu atu salva ita iha situasaun ida ne’e.

 Dili; 03 Abril 2020

Zaulino Gomes da Silva

Prezidente Executivu APFTL