Dili, 25/11/2021

Rede Koligasaun Agrikultura mak rede ne’ebé envolve agrikultór, grupu ema ho defisiénsia, setór privadu, grupu feto iha agrikultura, organizasaun juventude, LGBTI, grupu kooperativa, movimentu sosiál no grupu sira seluk ne’ebé iha interese atu dezenvolve seitór agrikultura no promove ekonomia diversifikada ne’ebé sustentável no inkluzivu iha Timor-Leste.

Rede Koligasaun ida ne’e konkorda hodi harii no estabelese Sentru Mídia Iha sekretariadu Rede Hasatil iha Farol, Díli, hodi monitoriza, akompaña no halo advokasia ba diskusaun proposta Orsamentu Jerál Estadu tinan 2022.  Sentru ida ne’e sei fasilita espasu ba ema no organizasaun oi-oin, atu fó sira nia hanoin no akompaña prosesu debate OJE tinan 2022 iha Parlamentu Nasionál. Rede Koligasaun Agrikultura mos husu ba Parlamentu Nasional no governu atu halo debate ho kle’an, matenek ho kuidadu, hodi konsidera situasaun real ne’ebe agora Timor-Leste hasoru.  

Erminínia de Jesus Pinto, Porta Voz Rede koligasaun Agikultura refere ba proposta OJE tinan 2022 katak, mina sei maran iha tempu besik,“realidade públiku hatene katak, Fundu Petrolíferu sei hotu iha tempu besik, tamba ne’e governu tenke investe seitor agrikultura no seitor produtivu seluk hodi diversifika ekonomia Nasionál” tenik Ermínia de Jesus Pinto, Porta Voz Rede Koligasaun Agrikultura ba Jornalista.

Sentru mídia ne’e sei realiza konferénsia imprensa, programa Talk Show, diskusaun konjunta no  diskusaun nakloke ba jornalista sira kona ba análize proposta Orsamentu Jerál Estado tinan 2022 no atividade importante seluk tan. 

Sentru mídia ne’e sei funsiona husi inísiu diskusaun Proposta OJE tinan 2022 iha fulan Dezembru tinan ne’e no sei kontinua monitoriza orsamentu ne’ebé promulga husi Prezidente Repúblika.

Iha Sorin Seluk, Mariano Ferreira nu’udar Sosiedade Sivil  Lao Hamutuk realsa katak, Governu tenki Investe  maka’as iha Seitor Agkrikultura tamba  ita labele garante nafatin ba Fundu Petroliferu  loron ida  sei maran, nune’e governu presiza tau osan ka  subsidiu ba  agrikultor sira atu hasae seitor produsaun hodi garante ekonomia inkluzivu iha Timor-Leste.

Iha fatin hanesan, Marcos de Jesus Martins nu’udar grupu Produtivun husi Forum Juventude Difisiensia Ermera hateten, governu tenki tau prioridade ba grupu produtivu sira inklui mos ami grupu Difisiensia sira, tamba dala barak ema dehan ami Difisiensia labele halo buat ida , maibe realidade ami bele  hanesan mos ho ema sira seluk.

#InvesteIhaSetorAgrikultura

#IhaOJE2022

 #DiversifikaEkonomia