Alumni Parlamentu Foinsae Timor-Leste realiza Assembleia Jeral Anual [AJA] 2020 hodi aprezenta Relatoriu Programa no/ka atividade APFTL 2019, no mos halo aprovasaun ba Planu Asaun Anual [PAA] 2020.

Assembleia ne'e rasik lidera husi Presidente Reuniaun Jeral APFTL - Lizerio Dias, iha abertura AJA nia dehan; "Tinan-tinan ita sempre realiza AJA, nu'udar estatutu haruka, hodi apresia ba serbisu Exekutivu nian no aprova Planu atividade tinan ida nian, inklui mos diskute kestaun diversu" Salaun MSSI, 7 Fevereiru 2020.

Lizerio mos hateten, APFTL respeita tebes prinsipiu demokrasia, tan ne'e Planu Asaun Anual tenke hetan uluk aprovasaun iha Assembleia, no hafoin Korpu Exekutivu APFTL exekuta planu hirak ne'e durante tinan ida, sira iha dever hodi aprezenta fila-fali progresu atividade tuir planu aprovadu iha AJA.

Iha fatin seluk, Prezidente Exekutivu APFTL - Zaulino Gomes da Silva, relata; "Husi Planu atividade 35 ne'ebe aprova iha Assembleia 2019, Ita konsege Exekuta ka realiza 80% atividade no la konsege realiza 20%" dehan Zaulino iha Salaun MSSI, Caicoli - Dili.

Presidente Exekutivu APFTL mos hateten, atividade sira ne'ebe la konsege realiza tanba laiha fundu ba atividade hirak ne'e, mesmo que Exekutivu esforsu maka'as buka fundu hodi bele realiza atividade sira ne'e hotu. Iha parte seluk mos Chefe Divizaun sira konfesa katak sei menus kreatividade no/ka inisiatividade rasik husi Chefe Divizaun sira, hodi nune'e atividade balun la konsege realiza.

Hafoin aprezentasaun relatoriu atividade 2019 husi Orgaun Exekutivu APFTL, Orgaun Fiskal APFTL aprezenta relatoriu fiskalizasaun nian iha Assembleia, toma nota katak Orgaun Exekutivu nunka fo informasaun ruma kona-ba realizasaun atividade ba Orgaun Fiskal hodi nune'e bele hala'o fiskalizasaun. Orgaun Fiskal mos kestiona ho kapasidade Membru Exekutivu nian ne'ebe ladun dezempenha tarefa sira ho diak, ne'ebe implika ba atividade balun la konsege realiza, kestiona mos reservatoriu/asset ne'ebe la guarda ho didiak.

Presidente Fiskal APFTL - Justino Jeronimo hateten, Orgaun Fiskal labele halo fiskalizasaun ho maxima tanba menus rekursu no so iha ema nain-tolu deit iha estrutura laran, dalabarak mos Orgaun Fiskal so halo deit observasaun jeral no husu tuir informasaun husi Exekutivu, ne'ebe informasaun ne'e los ita agradese, lalos mos ita la hatene ne'e lalos.

Hafoin apresiasaun ba relatoriu 2019, Assembleia kontinua kedas ba Sesaun Diskusaun no Aprovasaun Planu Asaun Anual [PAA] 2020. Iha diskusaun PAA, membru APFTL sira rekomenda planu atividade barak iha area oi-oin, ho nune'e iha PAA 2020 sita mos kona-ba Planu Apoiu Inisiativa membru APFTL, hodi nune'e loke dalan hodi fo apoiu ba membru APFTL hotu-hotu ne'ebe iha inisiatividade diak.

Assembleia Jeral Anual 2020 ne'e realiza iha Salaun MSSI, Sexta-feira 7 Fevereiru 2020, ba asesu relatoriu 2019 bele klik iha link ne'e [Relatoriu 2019].