Alumni Parlamentu Foinsa’e Timor-Leste (APFTL) kondena hahalok violentu ne’ebé komete husi membru PNTL hodi tiru mate saudozu Filomeno de Deus ho nia oan mane Camilo de Deus, no mos hakanek saudozu nia mane foun Januario Pereira iha loron 5 junu 2021, suku Lahane Osidental. APFTL la satisfas ho membru PNTL sira kontinua kaer kroat estadu nian hodi halakon sidadaun nia vida. Kazu hanesan ne’e laos foin akontese, resente liu iha ita nia kakutak mak trajedia Kuluhun no asaun brutal sira seluk ne’ebé membru PNTL sira komete, nune’e APFTL konsidera asaun membru PNTL sira nian ne’e, atu sai hanesan fali tradisaun iha instituisaun PNTL nia laran, no la fo lisaun diak ba Joven sira nu’udar Futuru hodi Lidera Instituisaun PNTL.

Ho ida ne’e, APFTL hakarak rekomenda hanesan tuir mai:

1. APFTL prekupa tebes aktu membru PNTL nian, ne’ebe la hatudu ezemplu no lisaun diak ba Joven sira nu’udar Futuru Nasaun;

2. Husu ba Instituisaun PNTL atu toma responsabilidade ba familia vitima nian hodi hetan justisa sosial;

3. Husu ba autoridade estadu atu halais prosesu justisa hodi kondena membru PNTL ne’ebé oho sidadaun nain-2 no hakanek sidadaun nain-1;

4. Husu ba governu atu halo teste psicologia ba membru PNTL sira hodi nune’e bele utiliza arma estadu nian ho responsabilidade;

5. Husu ba komando PNTL atu kontrola no regulariza arma sira, liu-liu bandu membru PNTL atu labele hodi arma ba uma no lori arma movimentu tun-sae bainhira laos halao funsaun;

6. Husu ba Primeiru Ministro, nu’udar mos Ministro Interior atu halo reforma iha Instituisaun PNTL;

APFTL hato’o sentidu kondolensia profunda ba familia enlutada no dejesu deskansa hakmatek ba saudozu Mateus ho nia oan Mane.