Grupu Haburas Talentu Joventude hari’i iha Suku Liurai Aileu Villa iha tinan 2019, sai manan nain daruak kategoria grupu juventude ba premiu nutrisaun Primeiru Ministru 2021, durante ne’e halo atividade sosial ba komunidade sira hodi kontribui hadia nutrisaun inan ho oan sira liu hosi aihan produtu lokal maka sira prepara rasik.

Apolonario Tilman, nu’udar koordenador HATAJO, hateten “Atividade nutrisaun ne’e inan no oan lubuk ida mak sai mos benefisiu iha suku Liurai, liu hosi ami halo sasoro ho naan manu lokal deut rahun hodi fo ba sira”. Nia mos hatutan sira mos prepara menu super food ne’ebé kompostu hosi Manu-tolun, Marungi, Koto mean, Fehuk midar, talas kor-laranja, no fore keli ne’ebé prepara no kontribui hosi membru HATAJO sira.

Finansa grupu, Joanita de Fátima mos tenik sira sosa produtu lokal hosi membru no komunidade sira hodi halo fali sai jus, bolo no kripik, dalaruma hetan pesanan hosi NGO sira mak halo seminariu, no halo dosi ba festa kazamentu ka aniversariu nian, depois hetan osan sira tau osan ba cash grupu nian hodi uza ba nesesidade seluk.

Joanita mos hatutan katak, laos membru hotu-hotu maka hatene halo dosi hosi aihan lokal, nune’e “mak agora dadaun ami pratika (aprende) hela, no ami nia pratika ne’e iha kada sábadu hosi sira (membru) seluk ne’ebé hatene halo ona”, dehan Joanita.

Horik kedas existe, Apolonariu esplika, membru HATAJO hetan kapasitasaun liu hosi workshop oi-oin ne’ebé fasilita hosi Word Vision, RIAN no Assosiasaun FADA. Alem ida ne’e, sira hetan premiu nutrisaun Primeiru Ministru 2021 ho montante $ 3.000, no hetan estimulu emprendedorismu sosial hosi Sekretaria Estadu ba Juventude no Desportu ho montante $ 1.000, ne’ebé HATAJO uza ba sosa sasan dapur nian, halo kolam ikan ho medida 15x17 metru no planeia hela halo manu luhan iha kolam ikan nia leten.

Grupu ne’e hari’i dahuluk ho membru hamutuk joven feto nain-8 no mane nain-17, ho hanoin ida atu halo servisu gotong-royong hodi hamo’os kafe du’ut, lere toos, kolleta hare rotativa entre membru grupu sira.

Agora dadaun grupu ne’e lalo’os fokus deit iha atividade produtivu sira, maibé sira mos fasilita kursu lian Portugês no komputador báziku, nu’udar atividade kapasitasaun ba membru no joven sira seluk, no sei loke tan kursu oi-oin iha sira nia fatin suku Liurai Aileu-Vila hodi hasa’e konesimentu joven sira ne’ebé iha interrese atu aprende.

Lider HATAJO ne’e mos esplika laos fasil hari’i grupu ida envolve membru barak, dalaruma iha diferensa hanoin no komunikasaun ne’ebé ladun diak, no dalaruma mos hosi familia sira rasik maka dezafia membru sira ho liafuan “tansa o tama grupu ne’e voluntáriu deit, nusa la buka servisu, nusa la hare’e modo fatin pessoal rasik nian kuda deit diak liu, nusa ba forma fali grupu" saran hosi Apolonario Tilman.

Nia mos akresenta katak, familia sira mos agora rekoñese ona sira nia halibur-malu fo benefisiu ba sira hotu-hotu, hanesan sira halo to’os, kuda modo no produtu oi-oin, hamos kafe sai kamaan liu tanba servisu hamutuk no ajuda malu. Alem ida ne’e, membru sira hetan benefisiu hosi formasaun oin-oin nune’e bele aumenta sira nia nia konesimentu.

HATAJO iha kintal ki’ik ida ne’ebé oferese hosi Pastor Igreja Assembleia de Deus ne’ebé sira halo ona lutu haleu kintal refere hodi kuda fehuk roupa, modo oi-oin, no kuda talas kor-laranja. HATAJO mos iha planu halo sabaun hosi produtu lokal, inklui halo sosializasaun kona-bá konservasaun ambiente no kuda ai-horis hodi halo reflorestasaun no prevene dezastre natural rai halai.

“Iha hanoin inovativu ida atu halo, tanba ami balun hatene transforma aihan lokal ba sabaun” dehan koordenador HATAJO. Nia hatutan tan mos katak, sira koalia ona ho Ajensia balun, inklui OXFAM atu apoiu sira ekipamentu hodi halo sabaun ne’e.

Maske HATAJO existe ho sira nia kbi’it naton, maibé sira halo kontribuisaun ba komunidade sira nia moris diak, inklui benefisia ba sira nia membru rasik. Ho motivasaun ida katak, sira bele kontribui ba dezenvolvimentu no kria rasik servisu hodi sustenta sira nia vida rasik nu’udar joven ne’ebé produtivu.