Formasaun Regular Edukasaun Sivika no LBSE sai prioridade iha Divizaun Formasaun APFTL

Deklarasaun Foto : Chefe Divizaun Formasaun APFTL, Joni Alves, no Partisipante formasaun husi UNETL


Divizaun Formasaun APFTL realiza formasaun Regular iha Salaun Sede APFTL Becora, hodi fo espasu ba  joven sira aprende kona-ba Materia Edukasaun Sivika no LBSE, no husi Janeiru 2020 formasaun maka realiza ona hetan partisipasaun husi joven nain-172.

Intensaun husi formasaun regular sira ne’e maka aumenta konesimentu ba iha Edukasaun Sidadania no mos kona-ba Edukasaun Moris lor-loron, hodi muda atetute no hasae abilidade joven sira.

Dehan Joni Alves, Chefe Divizaun Formasaun APFTL.

Chefe Divizaun Joni Alves mos esplika, Formasaun Edukasaun Sivika, foka liu ba aprendizajen Edukasaun Sidadadia, oinsa lori joven sira komprende kona-ba Demokrasia no moris iha Sosiedade Sivil, hodi forma joven sira respeita valor demokrátiku, justu, promove hakmatek no responsabilidade.

Formasaun Life Skill Based Edukation, ka habadak LSBE, lori joven sira hatene sira nia-an rasik no mos ema seluk, inklui hodi hatene kualidade espesial kada joven ida-idak, hodi analiza nia forsa rasik no mos hodi bele apresia ema seluk nia kualidade.

Formasaun regular ne'ebe realiza iha Sede APFTL, hetan partisipasaun husi Grupu ka Organizasaun Juventude hanesan UNE-TL, Timor-Leste Youth For Peace, Youth Community Care, Assosiasaun Estudante Munisipiu Liquiça, Rotarack Club of Dili no Roman Foinsa’e Timor-Leste, no mos joven universitariu sira.

Hare’e ba Planu Asaun Anual 2020 APFTL nian, formasaun Regular sira ne’e hanesan atividade ida husi planu maka aprova ona iha Assembleia Jeral Annual. Grupu balun APFTL maka konvida no seluk maka sira rasik rona hodi mai koordena ho APFTL.

Hatutan Joni Alves

Chefe Divizaun ne’e mos observa katak, joven sira iha vontade duni hodi aprende, tanba materia formasaun iha relasaun ho moris loro-loron nian, no interasaun diak entre Formador husi APFTL ho Partisipante formasaun ne’e.

Dezafiu maka APFTL hasoru, ida maka fatin formasaun APFTL nian ladun luan, nune’e limita tebes númeru partisipante formasaun, seluk maka Partisipante sira mos mesak estudante, ho nune’e iha oras balun sira la partisipa formasaun tan sei prezensa iha aula aprendizajen eskola nian.

Kona-ba Material Logistika, APFTL iha material sufisiente hodi fasilita formasaun … APFTL mos aplika formasaun sira ne’e gratuita, maibé iha nia kriteira rasik, katak partisipante sira sei simu sertifikadu formasaun kuandu sira tuir formasaun kompletu tuir tempu determinadu.

Hatutan Joni Alves

Alende ne’e, Formasaun Seluk ne'ebe APFTL bele fasilita maka Analiza Sosial Basiku, Lideransa Basiku, no Jestaun Organizasaun no Finanseira. Iha mos formasaun LSBE ne’ebé realiza iha Munisipiu Lautem, Manufahi no RAEOA tan apoiu husi UNICEF, no Ajensia Internasional Alemanha – GIZ, fo apoiu ba formasaun Edukasaun Sivika ne’ebé realiza iha Munisipiu Baucau, no sei realiza mos iha Suku Hera, Dare no Macadade. fim

Hakerek Komentariu Iha Account Facebook

0 Komentariu

HAKEREK KOMENTARIU

Fatin Email