Estrutura Exekutivu Alumni Parlamentu Foinsa'e Timor-Leste no membru APFTL balun, partisipa workshop Rapid Survey & Institutional Assessment organiza husi UNICEF, ne'ebé iha tempu badak sei halo estudu ba Orfonatu 22 iha Timor-Leste kona-ba protesaun labarik no issue relasionada ho COVID-19.

Objetivu husi halao Rapid Survey & Institutional Assessment Orfonato 22 maka hodi hatene oinsa labarik sira pratika kondisaun saudavel no higiene, asesu ba informasaun kona-ba COVID-19, no prevalensia violensia hasoru labarik.

Iha workshop ne'e mos hetan aprezentasaun badak kona-ba Child Protection Principals no teknika intervista ba labarik. Iha biban ne'e membru APFTL hetan esperiensia kona-ba halo estudu aprosimasaun ou peskiza, hodi promove papel APFTL hodi halo estudu no Advokasia ba Labarik no Foinsa'e.

Alende halo estudu ne'e, UNICEF sei distribui material higiene ba Orfonatu sira no mos Tablet ida ba Pontu-fokal Orfonatu tan sei iha atividade animasaun virtual ne'ebé APFTL maka sei fasilita. [Fim]