Alumni Parlamentu Foinsa’e Timor-Leste (APFTL) parseria ho Sekretária Estadu Juventude no Desportu- SEJD realiza formasaun Life Skill Based Education/ Edukasaun Bazeia iha Abilidade Moris ba Joven sira iha Postu Administrativu Maubisse, Munisipiu Ainaro. Formasaun ne'e partisipante hamutuk na’in -37, kompostu hosi mane na’in-15 no feto na’in -22. Atividade Formasaun ne’e, durante loron tolu hahú hosi 17 to’o 19 fulan- Agostu-tinan-2022 no hala'o iha Eskola Sekundaria Santo Inacio Loyola.

Objetivu hosi formasaun ne'e maka joven sira-nia koñesimentu natoon kona-ba sira-nia abilidade sira iha sira-nia an no uza hodi foti desizaun pozitivu ba sira-nia an iha futuru.

Formasaun  refere  abertura husi Administrador Posto Administrativu Maubisse Sr. Claudino Mendonça, iha nia intervensaun dehan, “edukasaun ne’e importante tebes iha ita- nia rai tanba ne’e foin-sa'e sira presiza aprende no estuda barak hodi serbii ita-nia rain. No husu ba partisipante hotu hodi partisipa ho másimu durante loron tolu nia laran, nune’e bele aumenta imi-nia koñesimentu.

Iha okaziaun hanesan, komadante eskuadra PNTL Maubisse Sr.Adolfo B. S. Mata, agardese ba APFTL tanba bele mai fahe koñesimentu no matenek  ba foin-sa'e sira iha Maubisse no enkoraza foin-sa'e sira atu bele aproveita oportunidade ho di’ak.

Iha fatin hanesan reprezentante Prezidente APFTL Sr. Luis Maria Ximenes Freitas hodi Prezidente APFTL nia fatin, hato'o agradese wa’in ba Unidade Servisu Postu Administrativu Maubisse tanba bele kopera hodi servisu hamutuk no agradese mós ba Na’i Administrador Posto Administrativu Maubisse ho komadante Eskuadra PNTL Maubisse ne’ebé ho laran kmaan bele marka prezensa iha atividade ne’e.

Atividade formasaun ne’e, abertura hosi Admnistrador Postu Maubisse, akompaña hosi komadante eskuadra PNTL Maubisse, membru APFTL , no partisipante sira mak estudante hosi eskola Sekundaria Santo Inacio Loyola.

#JovenAtivuSaudavelProdutivuKompetitivuOrgulluNuudarTimorOan