Dili, Timor-Leste, [4 Setembru 2024] – Asosiasaun Alumni Parlamentu Foinsa’e Timor Leste (APFTL) kondena maka’as asaun brutál ne’ebé hala’o husi ekipa konjunta SEATOU no Saneamentu Munisipiu Dili iha Tersa-feira, 3 Setembru 2024, maizumenus tuku 7-8 kalan. Iha akontesimentu preokupante tebes ne’e, ofisiál sira la’ós de’it dispersa negosiante sira iha área Comoro, maibé mós halo asaun violentu ne’ebé rezulta estragu maka’as ba sira-nia karroxa no produtu negosiu sira.

Asaun ida ne’e la’os deit destruisaun ba sasan, maibe mos destruisaun ba esperansa no mehi negosiante ki’ik sira nian. Karroxa ne'ebé rahun no modo sira ne'ebé namkari, nu’udar prova ba sira nia serbisu maka'as no luta atu fó han no sustenta nesesidade sira nia família.

Imajina, inan-aman sira ne'ebé kada lorokraik to’o kalan sai fa'an modo, tenke hare’e ho sira nia matan rasik, sira nia sasan ema estraga tiha. Labarik ki'ik sira ne'ebé hein hela sira nia hahán favoritu eh sosa sira nia roupa foun, agora sai deziludidu tanba sira nia inan-aman nia fonte rendimentu lakon ona.

Labarik kiik sira ne’ebé akompaña sira-nia inan-aman faan modo, hetan trauma ne’ebé bele afeta ba sira nia saude mental, tan sira assiste direta sofrimentu hosi sira-nia inan-aman ne’ebé ekipa SEATOU no Saneamentu Munisipiu Dili, halo rahun sira nia sasan no modo sira.

Liu tan, APFTL subliña fallansu governu nian hodi organiza atividade negósiu povu ki’ik sira nian. Mesmu governu hasai ona apelu ba negosiante sira atu labele fa’an iha fatin ne’ebé rame, apelu ida ne’e la akompaña ho solusaun alternativa ne’ebé viável. Governu tenke fornese fatin ida ne’ebé adekuadu, disponivel no fasil ba asesu atu fa’an ba negosiante ki’ik sira, atu nune’e sira bele kontinua fa’an sein perturba trafiku.

Merkadu Manleuana no Taibessi, hanesan sentru merkadu ne’ebé simu produtu agrikola eh hortikultura hosi Munisipiu sira, maibé la estratejiku iha aspetu distribuisaun ba konsumidor sira no mos la assesivel ba povu babain sira atu asesu ho lalais no fasil.

Prezensa Karroxa no negosiante ambulante sira hanesan iha Becora, Audian, Fatuhada, Bairo Pite, Elemloi, Kampung Baru, Eis Merkadu Comoro no seluk tan, maka fasilita ona povu kiik sira asesu ba produtu lokal ba sira-nia konsumu uma laran. Negosiante sira iha fatin hirak ne’e uza tempu balun deit, la’os loron tomak, nune’e presija deit atu organiza halo diak liu tan, hodi suporta no estimula sira nia atividade negosiu, nune’e sira bele iha oportunidade hetan rendimentu hodi sustenta sira nia nesesidade uma laran.

Hahalok brutal ida ne’e hatudu bebeik ona, refleta governu laiha politika ida ne’ebé pro ba povu kiik nia moris diak. Governu tenke sai proativu liu hodi buka win-win solution, entre negosiante kiik ho ordenamentu publiku, em vez de uza violénsia hodi rezolve problema sira. Fallansu governu nian hodi organiza atividade negosiu povu ki’ik sira nian halo situasaun ida ne’e sai aat liu tan.

Hatene mak sobu, duni no estraga, maibé la hatene oinsa estimula no suporta atividade negosiu hosi povu kiik sira.

APFTL ezije:

1. Investigasaun klean: Ami husu ba Autoridade defensor justisa atu halo kedas investigasaun independente no transparente ba kazu ida ne’e. Autór sira ba aktu violénsia nian tenke hetan prosesu tuir lei aplikavel.
2. Kompensasaun: Negosiante sira ne’ebé sai vítima iha direitu atu hetan kompensasaun adekuadu ba lakon materiál no produtu sira ne’ebé hetan estragu.
3. Protesaun Legál no Justisa: Estadu tenke garante protesaun legál ba negosiante hotu-hotu no garante katak sira bele hala’o atividade ekonómika bem-organizado, no sira laiha sentimentu ta’uk, eh hetan pressaun husi ukun-nain sira.
4. Solusaun Longu Prazu: Governu tenke dezenvolve kedas programa kompreensivu ida atu organiza atividade negósiu povu ki’ik sira nian, inklui fornese fatin ne’ebé di’ak no fasil atu asesu no fa’an produtu, iha fatin estratejiku sira, hanesan exemplu modelu merkadu ai-fuan Lecidere no Tais Market Colmera.

Aktu brutál ida-ne'e hanesan marka metan ida iha istória aplikasaun lei nian iha ita-nia rain. Ami hein katak governu bele foti pasu firme hodi prevene insidente sira ne'ebé hanesan atu labele akontese tan iha futuru. Ita iha ona esperiensia Setembru Nakukun 1999, no espera katak labele iha tan Setembru Nakukun iha futuru.