Estudante nain-31 husi Finantil tuir formasaun Edukasaun Sivika ho komitmentu no neon badinas durant

Deklarasaun Foto : APFTL


Hafoin remata formasaun Edukasaun Sivika iha Escola Secundaria Finantil, Prezidenti Exekutivu APFTL, Zaulino Gomes da Silva apresia tebes ho komprissiu ne’ebé hatudu husi estudante eskola refere, no nia hateten katak foin maka primeira vez APFTL fasilita formasaun ne’ebé partisipante sira hotu ho komitmentu partisipa to formasaun remata.

“Ha’u rona mensagem husi kolega formador sira katak imi nain-31 partisipa kompleta formasaun, ne’e historia ida ne’ebé foin ami APFTL registu” Dehan Zaulino Gomes da Silva iha enseramentu formasaun.

Prezidente Exekutivu APFTL mos agradese ba Autoridade Eskola Finantil nian tanba fo ona disponibilidade hodi APFTL bele realiza formasaun ne’e iha sira nia eskola, no husu mos ba partisipante sira para depois tuir ona formasaun ne’e bele implementa iha sira nia moris lor-loron no mos para fahe tutan informasaun sira ne’e ba sira nia kolega hotu.

Husi reprezentante Autoridade Eskola mos agradese ba ekipa APFTL tanba realiza ona formasaun Edukasaun Sivika iha sira nia eskola, no admira ho formador sira nia maneira durante formasaun tanba atrai tebes partisipante sira hodi badinas liu tan partisipa formasaun ne'e to'o remata. Reprezentante Autoridade Eskola hateten mos katak Finantil sempre partisipa iha atividade sira ne’ebé APFTL realiza no sei nafatin partisipa karik hetan informasaun husi APFTL.

Iha enseramentu formasaun, Pedro da Costa (idade 18) hanesan partisipante formasaun ne’e expresa nia sentimentu, dehan “Senti kontenti teb-tebes, ami senti hanesan simu buat foun mai ami, ami nia experiensia bele klean liu tan, no mos ami la espera katak ami bele tuir formasaun ne’e”

Pedro mos hateten nia sei koko oituan-oituan atu pratika saida maka nia hetan ona husi formasaun Edukasaun Sivika ne'e, no mos sei fahe informasaun ne'ebe nia hetan ona ba nia kolega sira seluk.

Formasaun Edukasaun Sivika ne’e fasilita husi Alumni Parlamentu Foinsa’e Timor-Leste, ne’ebé hetan suporta husi Agensia Alemaña GIZ, no partisipa husi estudante Escola Secundaria Geral Finantil hamutuk nain-31, hahu husi dia 9 – 12 Setembru 2019. No tuir planu katak, sei realiza mos formasaun Edukasaun Sivika iha Escola Secundaria 10 de Desembro Comoro, komesa 23 - 25 Setembru 2019.

Hakerek Komentariu Iha Account Facebook

0 Komentariu

HAKEREK KOMENTARIU

Fatin Email